કોલેજના બીજા વર્ષમાં અભ્યાસ કરતી કુંવારી યુવતીએ બાળકને જન્મ આપ્યો, પિતાનું નામ પૂંછતા હોસ્પિટલનો સ્ટાફ ચોંકી ગયો

એક ચોંકાવી દેતો અને સનસનીખેજ કિસ્સો પ્રકાશમાં આવ્યો છે. અમદાવાદના નારણપુરા વિસ્તારમાં રહેતી એક યુવતીએ એસવીપી હોસ્પિટલમાં બાળકને જન્મ આપ્યો છે. જોકે, યુવતીના બાળકના પિતા અંગે કશુંય બોલવા તૈયાર નથી. એટલું જ નહીં, તેના માતાપિતા પણ આ મામલે ભેદી મૌન ધારણ કરીને બેઠા છે ત્યારે પોલીસ પણ આગળ શું કરવું તેને લઈને ગૂંચવાઈ છે.

પ્રાપ્ત વિગતો અનુસાર, ત્રણેક દિવસ પહેલા આ યુવતીએ બાળકને જન્મ આપ્યો હતો. જોકે, હોસ્પિટલના સ્ટાફ દ્વારા બાળકના પિતાનું નામ પૂછવામાં આવ્યું ત્યારે યુવતીએ કંઈ જવાબ ના આપતા આ મામલાની જાણ પોલીસને કરવામાં આવી હતી. કુંવારી મા બનનારી આ યુવતી બી.કોમના સેકન્ડ યરમાં ભણતી હોવાનું જાણવા મળી રહ્યું છે. તેની સાથે તે CAનો અભ્યાસ પણ કરતી હતી.

સૂત્રોનું માનીએ તો યુવતીને સોશિયલ મીડિયાના માધ્યમથી એક યુવક સાથે પરિચય થયો હતો. બંને વચ્ચે ધીરે-ધીરે નિકટતા કેળવાતા તેમની વચ્ચે શારીરિક સંબંધો પણ બંધાયા હતા. આ દરમિયાન યુવતી પ્રેગનેન્ટ થઈ ગઈ હતી. પોલીસનું માનવું છે કે, યુવતીની પ્રેગનેન્સી અંગે તેના માતાપિતાને પણ જાણ હતી, તેમ છતાંય તેઓ કોઈ બદનામી થશે તેવા ડરે કાયદાકીય કાર્યવાહી કરવા તૈયાર નથી. તેમને ફરિયાદ કરવા સમજાવવાના અનેક પ્રયાસ પણ હજુ સુધી સફળ નથી થઈ શક્યા.

બાળકને જન્મ આપનારી આ યુવતી સાથે કંઈ ખોટું થયું છે કે તેમ તે જાણવા માટે પોલીસે તેની પાસેથી તેના કહેવાતા પ્રેમીનો નંબર મેળવવા પણ પ્રયાસ કર્યો હતો. જોકે, તેના માટે પણ આ યુવતી તૈયાર ના હોવાથી પોલીસ ગૂંચવાઈ છે. તેના માતાપિતાને પણ ફરિયાદ કરવા માટે સમજાવવાના પ્રયાસ કરવામાં આવ્યા છે. યુવતી હાલ હોસ્પિટલમાં એડમિટ છે કે કેમ તેની કોઈ વિગતો પ્રાપ્ત નથી થઈ શકી.

પરંતુ તે ચારેક દિવસ પહેલા અહીં એડમિટ થઈ હતી. ડૉક્ટરોએ તેની ડિલિવરી પણ કરાવી હતી. જોકે, બાળકના જન્મ બાદ જરુરી કાર્યવાહી કરવાનો સમય આવ્યો ત્યારે યુવતીએ પોતે કુંવારી છે તેવું કહેતા હોસ્પિટલનો સ્ટાફ ચોંકી ગયો હતો.

સોશિયલ મીડિયાના જનામામાં આજકાલના યુવક-યુવતી સેકન્ડોમાં જ કોઈના પ્રેમમાં પડી રહ્યા છે, અને તેમના પર વિશ્વાસ મુકી પોતાની આખી જિંદગી ખરાબ થઈ જાય તેવું પગલું ભરતા પણ વિચારતા નથી ત્યારે એક આશાસ્પદ યુવતી સાથે થયેલો આ કિસ્સો ખરેખર ચોંકાવનારો છે.

સ્વાભાવિક છે કે, માતાપિતા પાસે જ રહેતી યુવતી હજુ પ્રેમપ્રકરણ તેમનાથી છૂપાવી શકે, પરંતુ પોતાની દીકરી ગર્ભવતી છે તેવી કોઈ માતાપિતાને છેલ્લા સમય સુધી જાણ ના થાય તે વાત કોઈના પણ માન્યામાં આવે તેવી નથી.

એવું પણ જાણવા મળી રહ્યું છે કે, કાયદાકીય કાર્યવાહી કરવાનો સ્પષ્ટ ઈનકાર કરી રહેલા આ માતાપિતા હોસ્પિટલમાં એવી પણ વાતો કરતા હતા કે તેમને બાળક કોઈને આપી દેવાનું છે. બીજી તરફ, ફરિયાદ ના થઈ હોવાથી પોલીસના હાથ પણ બંધાયેલા છે.

error: Content is protected !!