દરિયામાં ન્હાવા પડેલી એક જ પરિવારની ચાર પુત્રીઓનાં મોત, પરિવારની સામે જ તોડયો દમ, ભાવુક બનાવ

વલસાડ જિલ્લાને અડીને આવેલા સંઘપ્રદેશ દમણના જામપોર બીચ પર આજે કરુણાંતિકા સર્જાઈ હતી. લખનૌથી ફરવા માટે આવેલા પરિવારની પાંચ યુવતીઓ દરિયામાં ન્હાવા પડ્યા બાદ ડૂબી જતા ચારનાં મોત નિપજ્યા છે. તો એક યુવતીનો બચાવ થયો છે. ડૂબી રહેલી યુવતીઓએ બૂમાબૂમા કરી હતી પરંતુ, કોઈ બચાવવા ન પડતા યુવતીઓ દરિયાના ઊંડા પાણીમાં ગરક થઈ હતી. ચાર યુવતીઓના મોતના કારણે કિનારા પર ઉભેલા પરિવારજનોમાં આક્રંદ છવાયો હતો.

ઉત્તર પ્રદેશના લખનૌથી આવેલો પરિવાર તેમના વાપી અને દમણમાં રહેતા સગા સંબંધીઓ સાથે ગુરૂવારનાં રોજ દમણના મોટી દમણ જામપોર દરિયા કિનારે ફરવા અર્થે આવ્યો હતો. જ્યાં પરિવારની 5 જેટલી છોકરીઓ દરિયામાં ન્હાવાની મઝા માણવા અર્થે દરિયામાં ગઈ હતી. જ્યાં અચનાક મજાક મસ્તી કરતાં કરતાં યુવતીઓ ઊંડા પાણી તરફ જતાં તરતા ન આવડતા ડૂબવા લાગી હતી.

જોર જોરથી ચીસો પાડતા દરિયા કિનારે બેઠેલો પરિવાર હેબતાઈ ગયો હતો અને તુરંત છોકરીઓને બચાવવા મદદની માંગ કરી હતી. દરિયા કિનારે કોઈપણ મદદે ન આવતા આખરે પરિવારનાં એક મોભીએ પોતાના જીવને જોખમમાં મુકી છોકરીઓને બચાવવાનો પ્રયત્ન કર્યો હતો. જ્યાં એક છોકરીને બચાવવામાં સફળતા મળી હતી. જ્યારે લાંબા સમય સુધી કોઈ મદદને ન આવતા આખરે 4 છોકરીઓનાં ડૂબી જવાથી મોત નિપજ્યાં હતા.

આખરે પરિવારનાં સદસ્યોએ એ જ ચારેય છોકરીઓની લાશને બહાર કાઢી હતી. આ તરફ એક સાથે પરિવારની ચાર છોકરીઓનાં મોત નિપજતાં દરિયા કિનારે પરિવારમાં આક્રંદ છવાઈ જવા પામ્યો હતો. આખરે અમુક લોકોની મદદથી ચારેય છોકરીઓને એમ્બ્યુલન્સ મારફતે મરવડની સરકારી હોસ્પિટલમાં લઈ જવા પામી હતી.

જ્યાં ફરજ પરનાં ડોક્ટરોએ તેમને મૃત ઘોષિત કરી હતી. પરિવારના સભ્યોએ આક્ષેપ સાથે જણાવ્યું કે, આટલા મોટા દરિયા કિનારે વિકાસ કર્યો હોવા છતાં કોઈપણ પ્રકારની સુવિધા કે સલામતી નથી. જો સમય સર મદદ મળી હોત તો આજે જીવ ગુમાવનાર છોકરીઓ જીવીત હોત. ત્યારે હાલ તો કોસ્ટલ પોલીસે આ મામલે તપાસ હાથ ધરી છે.