પતિ સાથેના ગેરકાયદે સંબંધની શંકાએ પત્નીએ મહિલા અને તેનાં બે બાળકને કૂવામાં ફેંક્યાં, માસૂમ બાળકોનાં કરુણ મોત

મધ્યપ્રદેશના બેતુલમાં ચારિત્રની શંકામાં એક મહિલાએ બીજી મહિલાનાં બે નિર્દોષ બાળકોની હત્યા કરી હતી. મહિલાએ પહેલા માતા અને 2 વર્ષની પુત્રીને કૂવામાં ધકેલી દીધી હતી. ત્યાર બાદ તેના 4 વર્ષના પુત્રને ફેંકી દીધો. કૂવામાંથી માતાની ચીસો સાંભળીને નજીકના લોકો દોડી આવ્યા હતા અને મહિલાને બચાવી હતી. બંને બાળકો ડૂબી ગયાં. ઊંડા પાણીને કારણે બાળકોને તાત્કાલિક બહાર કાઢી શકાયાં ન હતાં. બુધવારે સવારે 11 વાગ્યે પાણી ખાલી કરવામાં આવ્યું ત્યારે ઘટનાના 17 કલાક પછી બાળકોના મૃતદેહો મળી આવ્યા હતા. વિવાદનું મૂળ કારણ ગેરકાયદે સંબંધો હોવાનું કહેવાય છે. આરોપી મહિલાની પોલીસે ધરપકડ કરી છે.

આ ઘટના ચિચોલી જિલ્લાના કાન્હા ગામમાં મંગળવારે સાંજે બની હતી. પોલીસને સૂચના રાત્રે 09:30 વાગ્યે મળી હતી. પોલીસ અનુસાર સંગીતા(25 વર્ષ) પોતાના પુત્ર અંશુ(04 વર્ષ), પુત્રી અનન્યા(02 વર્ષ)ને લઈને બજારથી પરત આવી રહી હતી. રસ્તામાં તે જ ગામની રહેવાસી પિન્કી (25 વર્ષીય) મળી. બંને વચ્ચે ઝઘડો થઈ ગયો.

સંગીતાએ જણાવ્યું હતું કે પિન્કીના પતિ ગોલુ સાથે મારી વાતચીત થતી રહેતી હતી. પિન્કીને લાગતું હતું કે મારો અને તેના પતિ વચ્ચે કોઈ સંબંધ છે. એને લઈને તે મારાથી નાખુશ રહેતી હતી. તે હંમેશાં આ વાતને લઈને મારા જોડે ઝઘડતી હતી, જોકે હું ક્યારેય તેના પતિ સાથે આ બાબતે વાત નહોતી કરતી. ગોલુ સારો માણસ છે. અમારા વચ્ચે માત્ર વાતચીત થતી હતી, પરંતુ કોઈ સંબંધ નહોતા. પિન્કી મને કારણ વગર બદનામ કરવાનો પ્રયત્ન કરતી હતી.

પીડિતાના જણાવ્યા અનુસાર, તે બજારમાંથી આવી રહી હતી ત્યારે જ રસ્તામાં એક કૂવા પાસેથી નીકળેલી પિન્કીએ તેને રોકીને ઝઘડો કરવાનું શરૂ કરી દીધું અને ગુસ્સામાં તેણે પીડિતાને કૂવામાં ધક્કો મારી દીધો. પીડિતા પોતાની બે વર્ષની દીકરી સાથે કૂવામાં પડી ગઈ. તેનો 4 વર્ષનો દીકરો ભાગ્યો તો તેને પણ પકડીને કૂવાની અંદર નાખી દીધો. તે કૂવામાં એક ઝાડ સાથે લટકી રહી. આરોપી મહિલા પથ્થર મારીને તેને પાડવાનો પ્રયત્ન કરી રહી હતી. તેનો હાથ છૂટ્યો તો એક ઈંટ પકડીને લટકી રહી. પછી મોટેથી બૂમો પાડીને આજુબાજુના લોકોને બોલાવ્યા હતા.

સંગીતાએ જણાવ્યું હતું કે કૂવામાંથી બહાર કાઢ્યા બાદ મારાં બંને બાળકોની શોધખોળ ચાલુ હતી. બંને ઊંડા પાણીમાં ડૂબી ગયાં હતાં. ગ્રામજનોએ રાતભર પ્રયાસ કર્યો હતો, પરંતુ બાળકોને બહાર કાઢી શકાયાં ન હતાં. આજે સવારે કૂવાનું પાણી કાઢવામાં આવ્યું ત્યારે જ બંનેના મૃતદેહો મળી આવ્યા હતા. બીજી તરફ ચિચોલી પોલીસ સ્ટેશન TI અજય સોનીએ જણાવ્યું હતું કે આજે બંને બાળકોના મૃતદેહો મળી આવ્યા છે. પીડિતાને પ્રાથમિક સારવાર બાદ ઘરે મોકલવામાં આવી છે. આરોપી પિન્કીની ધરપકડ કરવામાં આવી છે.